Sunday, May 27, 2012

Amerika: Ijambo umuhuzabikorwa wa FDU-Inkingi muri Amerika yagejeje ku banyarwanda bitabiriye ibirori byo kwizihiza "Dusabane Day 2012"



Banyarwanda, Banyarwandakazi mutuye muli Ohio.

Mbanje kubashimira igitekerezo cyiza mwagize cyo guhuza abanyarwanda bo muli Ohio mucyo mwise “DUSABANE DAY 2012”. Nyuma y’imikino ngororangingo ni byiza ko twakwibukiranya n’inshingano  dufitanye n'abandi banyarwanda, ali abali mu gihugu ali natwe tuba hanze.

Uko mubizi Urwanda rufite amateka atali meza mu mitegekere y’igihugu.  Kuva kera abenshi muli twe tutaranabaho Abanyarwanda bategekeshwaga igitugu ndetse bigeraho babyemera bihinduka umuco.  Ngo ilivuze umwami bucya lyakwiriye hose. Ngo ukuruta agukubita yicahe.  Ngo ntawuburana n’umuhamba n’ ibindi.  Ibyo twiyibagiza aliko ni uko ibi byose bishobokera ubutegetsi  kubera ko twe abenegihugu tubyemera ndetse bamwe muli twe bakabikoreshamo umutwe wo kugambanira abandi ngo bicwe, banyagwe, cyangwa se bafungwe bazira amaherere. Ibyo bintu dushobora kubihindura.

Revolisiyo yo muli 1959 yagerageje gusubiza ubutegetsi mu maboko ya rubanda aliko ntibyatinze abakabyubahilije aba ali bo babitatira; ubutegetsi bwa MDR-Parmehutu buhinduka ubutegetsi bw’agatsiko kamwe noneho abana b’Urwanda basubiranamo babuhindura ubutegetsi butangwa kandi bugategekesha imbunda, ikiboko na mabuso ali bwo butegetsi bw’igitugu bwa MRND.

Ntibyatinze aliko ingoma y’igitugu ya MRND  isimburwa n’indi ngoma y’igitugu ya FPR-Inkotanyi binyuze mu ntambara y’akataraboneka ndetse FPR-Inkotanyi yo ishyiraho n'akarusho iteza itsembabwoko n’itsembatsemba mu bana b’Urwanda. 

Banyarwanda Banyarwandakazi, imyaka ibaye 17 abanyarwanda balyama ntibasinzire mu gihugu cyabo kubera guhunda yo kwihorera yimakajwe na FPR-Inkotanyi mu gihugu; abandi twambutse amashyamba n’inyanja turahunga tutibagiwe n’abavandimwe bacu bakiba mu nkambi z’impuzi impande zose z’isi ndetse n’abandi baheze mu mashyamba atandukanye bihisha ubwicanyi bwa leta ya FPR-Inkotanyi.

Kuva ubutegetsi bufatwa ku ngufu na FPR-Inkotanyi lero ntitwahwemye kwamagana iyi ngeso mbi ishaka kugirwa ihame ko nta butegetsi bushobora guhinduka mu Rwanda hadakoreshejwe intwaro no gusesa amaraso atagira ingano y’abana b'Urwanda. 

Byumwihariko FDU-Inkingi ifatanyije n’andi mashyaka n’amashyira hamwe arengera ikiremwa muntu duhuje imyumvire y’ikibazo, twagambiliye gusubiza nanone ubutegetsi mu maboko ya rubanda hakoreshejwe gupiganwa mu matora no kubahiliza uburenganzira bwa buli wese. 

Madame Victoire Ingabire Umuhoza, aliwe kandi ukuliye ishyaka litaremerwa lya FDU-Inkingi, ndetse yabitanzemo urugero afata iya mbere ajya gukorera politiki mu  gihugu no gupiganira umwanya wa Perezida wa Republika y’Urwanda nk’uko abyemererwa n’itegeko nshinga lya Republika. Ibyakulikiyeho mwarabyumvise, yangiwe kwandikisha ishyaka lye kugira ngo litagira umwanya mu rugaga rw’andi mashyaka akorera mu Rwanda; yaratotejwe birenze kamere, ndetse ageraho n’ho afungwa binyuranyije n’amategeko ngo azaburane ali muli prison.  Amezi abaye arindwi lero aburana uru rubanza rwa politiki leta ya FPR-Inkotanyi yamushoyemo ikoresheje ibirego bya nyirarureshwa bitagira epfo na ruguru, byaje kuzamo urugomo rwo gukanga abatangabuhamya baregura Ingabire noneho arushingukamo rutarangiye.  Ibihano bamusabira ntaho bihuliye n’amategeko.

FDU-Inkingi se n’iki? Madame Victoire Ingabire Umuhoza we ni muntu ki? Kuki tugomba kwiyambaza FDU-Inkingi muli iyi mpinduramatwara ya Demokarasi mu mahoro?

FDU-Inkingi ni ishyaka lyavutse liturutse ku bufatanye bw’ayandi mashyaka yakoraga  atatanye afite n’umusaruro muke mbere y’umwaka wa 2006. 

Muli uwo mwaka nibwo Madame Ingabire wali Presidente w'Ishyaka RDR yatangiye imishyikirano n'andi mashyaka yali ahanganye na FPR-Inkotanyi mu Bulayi abasaba kwibumbira hamwe kugira ngo barusheho kugira ingufu. Ubwo FDU-Inkingi iba iravutse igizwe n'amashyaka atatu aliyo RDR, FRD na ADR.

Nyuma yaho FDU-Inkingi yakomeje kwiyegereza andi mashyaka ndetse itangira no gushaka abayoboke nk'ishyaka limwe ryihariye. Mulibuka ko ali icyo gihe Madame Ingabire yadusuye hano muli Amerika agasiga ndetse ashyizeho ishami lya FDU-Inkingi muli Amerika dusigaye dukoreramo. 

Tariki ya 26 Nzeri 2009, Inama nkuru ya politiki (conseil politique) ya FDU-Inkingi yafashe icyemezo cyo kujya gukorera politiki mu Rwanda, inatora Madame Ingabire ngo azahagararire ishyaka mu matara y’umukuru w’igihugu yari ateganijwe muri Kanama 2010.

Iyo nama nkuru ya politiki ya FDU-Inkingi yanashyizeho Komite Mpuzabikorwa (Comite de Coordination) ya FDU-Inkingi. Iyo Komite Mpuzabikorwa ni urwego rukuru rushinzwe imirimo ya buri munsi y’abarwanashyaka ba FDU-Inkingi mu mahanga, no guhuza ibikorwa hagati y'ubuyobozi bw'ishyaka bw'agateganyo buri mu Rwanda n'abarwanashyaka bari mu mahanga. Komite mpuzabikorwa ikurikirana akazi k'ishyaka mu gihugu, ikagira inama komite nshingwabikorwa y'agateganyo iri mu Rwanda, ikanayishyigikira mu buryo bunyuranye.

Muri Mutarama 2010, Madame Ingabire yakomeje umuhati afata icyemezo gikomeye cyo gutaha mu Rwanda akaba aliho akorera politiki. Ubu lero ibyo byabaye impamo kuko komite nshingwabikorwa y’agateganyo ya FDU-Inkingi kugeza igihe ishyaka lizemererwa iba mu Rwanda aho ikomeje guhangana n'agahimano kavanze n'urugomo rwa FPR-Inkotanyi ishyigikiwe na komite mpuzabikorwa ya FDU-Inkingi iba mu mahanga ndetse natwe abayoboke n’abaterankunga ba FDU-Inkingi tutiyibagiwe.
 
FDU-Inkingi si ishyaka rigamije kwimakaza ubutegetsi bw'abahutu nk’uko Leta ya Kigali ikomeje gukwirakwiza ibi bihuha hirya no hino. Abayoboke ba FDU biganjemo abanyarwanda bo mu bwoko bw'abahutu kuberako yavutse abatutsi benshi batarumva neza imbogamizi zo gushyigikira ubutegetsi bw'igitugu  bwali bukibabeshya ko bwaje gukiza abatutsi. Ibi kandi Umushinjacyaha mukuru w’u Rwanda, Bwana Martin Ngoga yanabibwiye Madame Ingabire amusobanurira impanvu bamutoteza nk’uko byagaragaye mw'ibarwa Madame Ingabire yandikiye uyu Martini Ngoga, ibarwa yatangajwe na Komite nshingwabikorwa y'agateganyo ya FDU-Inkingi ibisabwe na Madame Ingabire ubwe.
 
Mu by’ukuri FDU-Inkingi ni ishyaka lyiyemeje kuvana abanyarwanda bose ku ngoyi y'ubutegetsi bw'igitugu rikoresheje inzira y'amahoro muli Demokarasi no kwubahiriza uburenganzira bw'ikiremwa muntu.
 

Ishyaka FDU-Inkingi rizabigeraho rite rero?

-  Kwimakaza ubutegetsi bushingiye ku mategeko yubahiriza uburenganzira bw'ikiremwa muntu n'uburinganire bwa bose imbere y'amategeko.
 
- Kwimakaza ubulinganire bw'abanyarwanda n'ukwishyira ukizana kwabo bisaba kurwanya akarengane, ubwikubire n'ubucakara, ndetse n'imigambi mibisha ya mpatsibihugu dushorwamo n'ibihugu by'amahanga bikulikiranye inyungu zabyo.
 
- Uburenganzira bwa buli wese bumuhesha agaciro agahangisha ubuhanga Imana yamuhaye, agakemura ibibazo bimwugarije kandi akiteza imbere mu busugire akurikiza amategeko.
 
- Ubufatanye bwunganira abandi mu nzego zitandukanye z'amatsinda agize abaturage, ubusumbane mu bukungu, ingeli z'amavuko  zitandukanye, na kamere itandukanye ya buli muntu.
 
- Uburenganzira bwa buli muntu bwo kwibuka abacu bapfuye. Itsembabwoko lyiswe Jenicide y'abatutsi, n'itsembatsemba byakorewe abanyarwanda byasize inkovu itazasibangana ku mitima y'abanyarwanda. Kugirango duce burundu amahano nk’aya yagwiririye abanyarwanda, FDU-Inkingi yiyemeje   gusigasira bidasubirwaho uburenganzira bwa buli muntu ku  buzima no kwibuka buli gihe abantu bose batubereye ibitambo mu ngoma z'igitugu n'intambara zitandukanye.
  
- Guha rubanda uruhare rugaragara mu  nzego zose z'ubutegetsi, gushyiraho, kugenzura no gukuraho ubutegetsi buriho binyuze mu nzira y'amategeko na  demokarasi.

- Gusaranganya ubutegetsi n'inzego zose zibugize duha inzego zo hasi ububasha bwo gufata ibyemezo bibureba butagombye gutegereza amabwiliza ava hejuru.

- Guharanira amajyambere ahamye kandi ahuliweho na bose twibaza buli gihe uko ibyemezo dufashe mu nzego za politiki bizahindura umutungo kamere w'igihugu, imibereho myiza y'abaturage mu minsi izaza n’uko bizahindura Urwanda n'abanyarwanda muli rusange.

Imigambi ishishikaje FDU-Inkingi muli ibi byose ni iyi:

1) Gushyiraho ubutegetsi bushingiye ku mashyaka ya politiki atandukanye.

2) Gukora ibishoboka byose kugirango Inama ngoboka gihugu (dialogue inter-rwandais hautement inclusif) izaterane, iyoborwe neza  kandi igere ku myanzuro iboneye abanyarwanda bose.

3) Guca umuco wo kudahana, tukimakaza ubutabera butabogamye, abarenganijwe bose bakabona indishyi y'akababaro ikwiliye.
 
4) Kuvanaho burundu ingeso y’ivangura n’icyenewabo, tugaha amahirwe angana abana bose b'Urwanda.
 
5) Gucyura impunzi no kuzifasha kwongera kwitabira kwubaka igihugu no guteza imbere ubuzima bwabo.
 
6) Kuvugurura no guteza imbere ubukungu buhamye bw'igihugu. 

7) Guhagarika  burundu intambara  z'urudaca zigabwa mu bihugu by'abaturanyi tukubakira hamwe akarere karangwa n'amahoro n'umudendezo. 


Murakarama. 

Theophile Murayi
Umuhuzabikorwa wa FDU-Inkingi muri Amerika.
DaytonOhio.
26 Gicurasi 2012.

0 Comments:

Post a Comment

Subscribe to Post Comments [Atom]

Links to this post:

Create a Link

<< Home